Siputam ti tignay dagiti allon
A mangpaypayapay iti ilelennek
ti agdudungsa a raya ni Apo Init--- agiinnunada
a makadanon iti arpadna.
Kas met la kadagitoy ilimlimed a rag-o
bileg ti gagar a sumangbay iti sidongmo
tapno umay pasappuyot iti kinabisked
ti naturay a lailom --- arayatennak!
Allukoyennak a manganag
No apay nga iti laksid dagiti panawen
a panagdaliasatko nga agmaymaysa ---
sumken met pay laeng ti daan nga iliw.
Addanto pay ngata panagbaaw
ti darang dagiti maris ti bullalayaw a tunged?
Wen, urayek a lumdag dagiti bukel
ti sumsumga a masakbayan--- kibinennak.
No comments:
Post a Comment
leave your comments here: