Bituen Iti Kadaratan

Saludsodek koma kenka

Nagtagiarkos a bituen

Ammom kadi ti umanges

Ammom kadi ti umisem?

Saludsodek koma kenka

Malidlidayan a bituen

Ayan dagiti kakaduam

Ayan ni ing-ingungotem?

Saludsodek koma kenka

Agkarkaradap a bituen

Sadinno ti naggapuam

Sadinno ti turongem?

Saludsodek koma kenka

Agmaymaysa a bituen

Apay nga awanankat' rimat

Apay a nayatka a naibelleng?

Agsaludsodak pay koma

Ngem naibusanakon ti balikas

Kayatmo kadi nga itugotka

Ket kaduaennak nga agdaliasat?

Adayo pay ti pagnaenta

Nailet dagiti desdes

Nasamek dagiti kabakiran

Naatap dagiti darepdep