Rugiakon a Sangitan ti Masakbayan

Rugiakon a sangitan ti masakbayan

Iruamkon ti agtaraon iti bukodko a saibbek

In-inutekon a sursuroen ti agpakada 

kadagiti sirmata a saanen a sumangbay

Narasayen dagiti gundaway

Agngangabit nga anges, maiwalwallages

a kas ullaw a no magsatanen iti linas,

itulokna lattan nga allopen ti angin.

Naliday ti kuerdas ti tapuktapok a biolin.
Diak pinunasan ngem inabayko. Inandingayko.
Umukuok iti kaunggan dagiti sainnekna,

kas punial a maiwekwekwek iti di-agrupsa a lagip

Diakon urayen a sumirip ti anaraar.

Ita a sardam, alimonekon ti pait

nga intungpa ti aglaladoten nga agsapa.

Rugiakon a sangitan ti masakbayan.