Kiddaw ti Layap

Napintasak kan' a buya iti law-ang
Maay-ayo amin a makaimatang
Ket iti panagsuekko, adut' mangikararag
Pannakatungpal dagiti arapaap

Ngem mano ngata kadakuadat' makaamiris
A no mabalin 'diakon panawan ti langit
Ta no adda la koma imetko a pannakabalin
Agnaedak arpadnan, agserbi ken agpaadipen

Narigat ti agdaliasat, aglalon' agpababa
Amin a saem masabat, rigat masagaba
Agragrag-o dagiti nabati iti ngato
Siak a naibelleng, saibbek ti nangtaripato

No pay kasta, awananak met iti gaway
Ta isut' akemko sipud pay naipasngay
Inton madanonkot' pakailumlomak a lubong
Makeltay metten toy biag, aklonekton.

No mabalin la koma a kiddawek iti langit
A salbarennak iti nakaro unay a ladingit
Iyadayonak iti tuok ken pannakapaay
Maisubliak a kas bituen no maikarkariak pay.




(Aileen) 08/sep/2012